Editorial Galaxia publica, en colaboración coa Dirección Xeral de Política Lingüística da X unta de Galicia, a tradución para o galego de A república dos soños, un dos cumes da obra narrativa de Nélida Piñon, escritora brasileira de orixe galega. A novela é unha homenaxe ás súas raiceiras e aprofunda na epopea da emigración galega a alén mar. Traducida ás linguas máis prestixiosas do mundo, aparece agora tamén en galego, a lingua dos pais da autora.
Os lectores e lectoras teñen nas súas mans non só un dos títulos fiáis sobranceiros de Nélida Piñon, tamén un dos fitos da narrativa brasileira contemporánea. A república dos soños, publicada por primeira vez en 1984, obtivo o Premio da Associaçao de Críticos de Arte de Sao Paulo e o Premio Pen Clube ao mellor libro de ficción. A novela conta a historia de dous rapaces que embarcan en Vigo rumbo ao Brasil. É o ano 1913, o éxodo de emigrantes galegos acabaría por ser unha sangría de máis de millón e medio de persoas que atravesan o Atlántico á procura da súa «república dos soños».
Novela intensa e audaz, concibida coa forza tumultuosa desa enorme epopea que foi a emigración a América, Nélida Piñon escribe esta historia dunha maneira engaiolante. Todo un legado de resistencia e vontade por sobrevivir é transmitido a través dos dous protagonistas, o triunfador Madruga e o soñador Venancio. Dous xeitos de reflectir as glorias e frustracións dunha experiencia inesquecible e sempre presente na memoria de todos os galegos.