A figura de Faraldo está vencellada a tres grandes feitos históricos, que son os piares da renacencia cultural e política moderna de Galicia: o espertar dunha xeración romántica e progresista, formada no ambiente cultural e literario da Compostela que loitaba por se libertar da opresión levítica; o inicio do provincialismo político, como expresión da recuperación da identidade de Galicia; o levantamento de 1846, coñecido durante moito tempo como a ?revolución galega?, como manifestación do vencellamento entre un pronunciamento militar e un ideario galeguista, que tan asisadamente ten estudiado X. Ramón Barreiro. En todos estes acontecementos, o Faraldo que tomou parte era un mozo betanceiro, estudiante en Compostela, que estaba cheo de paixón e de ideais utópicos daquela ?algúns deles, nunca deixaron de selo?, como eran o da ?Grande Obra? ou o da ?metrópole populosa?. Co fracaso do levantamento de 1846, toda aquela ilusión da xeración progresista e romántica ficou esvaída.