Cun texto á vez tan fresco como elaborado, lúdico, erudito, ateigado de referentes culturais e divertido, revélase ante nós un excelente poemario dunha poeta nova, María do Cebreiro (Santiago de Compostela, 1976). Efectivamente, O estadio do espello é un libro sorprendente, que descubre unha autora sólida para o futuro das letras galegas. O poemario configúrase como unha especie de biografía emocional da súa autora, logo de que de nena tropezase ás escuras cun espello de pé e tras atravesar, con fortuna desigual, os espellimos da adolescencia para intimar con Alicia no outro lado. En O estadio do espello, constrúense os lugares sobre os nomes: os bárbaros do norte invaden o poema e os seus ollos traidores funcionan como múltiplos da subxectividade de María.