José Pinto Carneiro

Tendo como punto de partida o que serían uns “Informes confidenciais dun detective privado”, José Pinto Carneiro entrega ós lectores unha novela que se move no ámbito referencial do xénero negro pero dándolle o tratamento paródico e transgresor da mellor literatura contemporánea.
Manexando os recursos narrativos con gran mestría e mergullando o lector nunha serie ininterrompida de acontecementos perfectamente estructurados, cuns personaxes que gañan forza ó facer saltar en pedazos o arquetipo no que están inspirados e unha trama argumental que gaña en interese e misterio conforme a novela vai avanzando, o autor conta a historia dun detective privado que, no Portugal de hoxe en día, intenta saír da penuria dunha profesión esmorecente coa investigación do caso da desaparición, primeiro, e despois morte, dun mozo. Este caso inicial que lle encargan investigar acaba transformándose, en realidade, en moitos outros, todos relacionados e coa mesma orixe. O que primeiro pensaba era algo rutineiro acábase convertendo no máis estraño, complicado e perigoso dos casos de toda a súa vida.
Pinto Carneiro subverte as regras do xénero botando man dun narrador que conta a súa historia dirixíndose directamente ó lector, saltando así tódalas convencións e logrando unha narración dunha inmediatez e verosemellanza só superadas pola fina ironía e o xogo paródico que o texto establece principalmente coas referencias cinematográficas e as alusións a unha realidade que nada ten que ver coa recreada nese tipo de cinema.
Cun argumento cheo de sorpresas, acción, asasinatos e mesmo o esbozo dunha pequena historia de amor xunto a pinceladas de crítica social, o autor consegue unha das máis divertidas e orixinais novelas da última narrativa portuguesa.