EL SINDROME DE SHEREZADE

D’igual manera qu’a Sherezade –la protagonista de Les mil y una nueches– contar cuentos valió-y pa ganar –o caltener– la vida, a la humanidá inventar y contar cuentos y lleendes val-y pa esplicar a sigo mesma los misterios de la vida, de la naturaleza y de la muerte. Esti ye’l filu conductor qu’encadarma y entretexe la obra El síndrome de Sherezade de Vicente García Oliva, ganadora del Premiu d’Ensayu «Máximo Fuertes Acevedo» del añu 2010. Clara, concisa, mui bien desenrollada y guapamente contada, nella l’autor acuña un términu nuevu –«síndrome de Sherezade»– pa esplicar la querencia de les sociedaes tradicionales polos cuentos y cómo fueron a tresmitilos xeneración tres xeneración hasta los díes d’anguaño. Vicente García Oliva (Xixón, 1945) ye ún de los escritores más prolíficos de la lliteratura asturiana. Consideráu’l padre la narrativa xuvenil (Fontenebrosa: el reinu de los silentes; Les aventures de Xicu y Ventolín; Elemental, querida Lisa; Fontenebrosa II: la rebelión de los homosaurios, ente más otres), ye amás de narrador (El norte, Costelaciones) un estudiosu de la influencia de la tradición oral na nuestra lliteratura, con trabayos como El ríu soterrañu. La tradición na narrativa asturiana de güei.