Kontuz, Ikaro!

Mito greziar zaharra da Ikarorena: lumaz eta argizariz eraikitako hegalak bizkar gainean, hegan abiatu zen gaztea, preso zeukaten irlatik ihesi, baina, goregi airaturik, eguzkiaren beroak bere hegatsak desegin, eta itsasoan amildu omen zen, azkenik. Hamaika izan dira mitoaren interpretazioak nahiz artista askorengan inspiratu dituen obrak: dela pinturan, musikan nahiz zineman. Jon Gerediagak aktorez eta panpinaz jokaturiko antzerki-lan bat imajinatu du, mitoaren jatorrizko bertsiotik urrundurik baina gizakiaren barruko minak eta betiko kezkak azalduz: nor naiz ni, nora noa, zer egiten dut mundu honetan, nola izan libre…? Absurdoaren eta filosofiaren artean igeri dabilen proposamena dakarkigu egileak, estetikoki erakargarria bezain edukiz ausarta.