Los trabayos d'Hércules

La mitoloxía ye una fonte fresca y fonda onde siempre podemos dir a beber. L’arte, la lliteratura y la poesía de munchos sieglos alcontraron nella materia pa representar los sueños, les esperances y los mieos humanos y divinos. A la tradición inmortal y bayurosa de la mitoloxía griega pertenez la historia de los doce trabayos d’Hércules, fíu del dios Zeus y de la mortal Alcmena, y que ye l’héroe que meyor personifica la fuercia y el determín que se precisen pa dir pasando los trabayos que se presenten a lo llargo de les vides humanes.