MARIA PITA (GALEGO)

María Pita viviu dacabalo entre os séculos XVI e XVII, un período no que a poderosa monarquía dos Austrias comezaba a mostrar os primeiros síntomas de debilidade. Ela mesma ía converterse en testemuña privilexiada dese mundo cambiante chamado a transformar a situación do seu país e a da súa propia contorna, aínda que é probable que non fose moi consciente diso. Os problemas da vida cotiá obrigárona a centrar a atención noutras realidades máis inmediatas, capaces de asegurar a súa subsistencia nun escenario de crecentes dificultades.