📗 Libro en gallego ONDE NACE

Botei a escribir onde nace ao mesmo tempo que o libro Desde onde non nace, aló polo ano 2019. Ambos procuran camiños diferentes a todo canto eu estivera facendo até ese momento. Ver cara a onde dirixir o equilibrio do poema, a través das liñas de tensión creadas, á súa vez, polas repeticións asimétricas e descompasadas do texto, foi o cometido principal. Este exercicio, entre moitos outros, naceu de xeito prematuro cun libro anterior, Rompe, e chegou ao seu desenvolvemento máximo, precisamente, con Desde onde non nace. Deste xeito onde nace é, con certeza, unha obra por si mesma, mais sería incorrecto negar a relación con Desde onde non nace (que o inclúe, esconde e fagocita); dous libros complementarios que non se entenden na complexidade o un sen o outro. Hai diversas maneiras de ler poesía. Coido que onde nace é un bo exemplo.