ADEUS INDIA, ADEUS

Xosé, tras desertar do Exército español mentres facía o servizo militar, foxe a India en 1981, pouco antes do intento de golpe de Estado de Tejero. A afouteza e radicalidade de Xosé na busca dunha vida auténtica e anticonvencional adquiren trazos heroicos e, mentres permanece lonxe, pasa a converterse nun símbolo de rebeldía e integridade para o seu círculo de amizades: Paco, un pintor sen éxito, compañeiro de infancia: Manuel, un mozo intelixente e prometedor convertido en burócrata; Estrela, vella amante de Xosé e agora muller de Paco, obsesionada coa súa carreira docente na universidade... Así, cando en 1985 Xosé volve por sorpresa a Galicia, ao se reencontrar cos seus amigos, xa instalados na realidade da vida adulta, e contrastar a natureza superficial da súa propia evolución, a súa auréola mítica esborrállase. Adeus India, adeus narra o desencontro que o paso do tempo produciu entre uns mozos que compartiron anos de expectativas e ilusións de cambio na España da Transición. Un relato, poderoso e cheo de dinamismo, a medio camiño entre a crónica e a reflexión, entre Oriente e Occidente, que mereceu o Premio da Crítica de Galicia 2001 á creación literaria.