MADEIRA DE MAR, APUNTES SOBRE A GAMELA

Un libro singular froito de varios anos de investigación arredor dunha embarcación típica do sur de Galicia: a gamela. Velaquí un libro singular que se nos presenta como un estudio igual de ameno que fundado. Xúntanse na persoa do autor os coñecementos técnicos dun enxeñeiro naval co amor polo mundo da navegación dun home crecido na beiramar. Neste libro abórdase tanto a historia da gamela como os seus usos —do pasado e actuais— e os diferentes tipos existentes. É o mesmo autor quen confecciona toda unha serie de planos e ilustracións en cor que, ademais de facilitaren unha información moi útil tanto para afeccionados como especialistas, confiren un aspecto elegante a esta publicación de capa dura que nos trae á vista unha faceta particular da Galicia atlántica.