ARTISTAS GALEGOS ARQUITECTOS

Atopámonos ante un libro que estudia os pioneros da arquitectura moderna en Galicia e que é imprescindible para esclarece-los avatares da mesma. Pódese interpreta-la selección de arquitectos que constitúe o libro dentro de tres grupos, que coinciden coas tres primeiras xeracións de arquitectos do Movemento Moderno. Esta coincidencia xeracional tamén sinala certos paralelismos no desenvolvemento das traxectorias profesionais: a formación beaux arts ou académica recibida pola primeira xeración; a progresiva adecuación ós tempos que a industrialización e a modernidade marcaban; e a busca, especialmente na terceira xeración, de particularidades locais para compatibilizalas cos ideais da arquitectura racionalista. No primeiro grupo, formado por aqueles nados ó redor das últimas dúas décadas do século XIX, ó igual ca Mies van der Rohe e Le Corbusier, atópanse Rafael González Villar, Peregrín Estellés, que aínda que naceu en Valencia desenvolveu o seu labor profesional en Galicia, e Antonio Tenreiro. Nun segundo grupo sitúanse aqueles nados nas primeiras décadas do século XX: José Mª Banet e Díaz-Varela, Santiago Rey Pedreira, Francisco Castro Represas, Antonio Álex Reinlein, Pedro Alonso Pérez, nado en Madrid, Eloy Maquieira e José Caridad Mateo. E a terceira xeración, formada por Alejandro de la Sota, José Antonio Corrales, nado en Madrid, e Ramón Vázquez Molezún, Xosé Bar Bóo e Andrés Fernández-Albalat Lois.