Diariu indecente d’una docente

Diariu indecente d’una docente, ganó la quinta edición del Premiu «Enriqueta González Rubín» de narrativa moza n’asturianu gracies a la «buena construcción dende’l puntu de vista formal, l’equilibriu na so estructura y la naturalidá expresiva», según destacó’l xuráu. Esta novela cuenta, en prosa clara y precisa y con un llinguaxe frescu, los preparativos, desarrollu y consecuencies, más o menos imprevistes, del viaxe d’estudios d’un grupu de profesores, alumnos y alumnes d’un centru de secundaria, qu’acabará siendo un verdaderu esperimentu sociolóxicu y educativu, poniendo a prueba la capacidá d’adaptación d’esa mocedá incontrolable al mediu natural y a la privación de cobertura. «Estos testimonios puen valir como representación de les emociones del alumnáu énte la naturaleza: dalgunos sienten, como los románticos, lo sublime del paisaxe, españen allegría, rin (con esa triba de risa que solo pues tener cuando tienes quince años y les emociones son curties y fuertes, como la cayida l’agua d’un tabayón) y sienten almiración hacia tolo que ven: cabres, vaques, flores, roques, nubes… Son la meyor versión del ser humanu. Mentanto, otros temen a lo desconocío: la medrana y l’ascu tapecen la gayola. Onde unos ven flores, otros ven bichos peligrosos, onde unos ven brillar los inseutos como ayalgues nel prau, otros ven el peligru de les picadures, onde unos ven l’algodón de les nubes, otros ven el peligru de la truena, onde unos ven la paz del ganáu, otros ven el peligru de lo salvaxe. Por toos ellos se fai’l viaxe: pa que los optimistes cultiven el so espíritu y pa que los medranosos deprendan que lo desconocío nun ye tan tarrecible».