FILOSOFIA AMAITU GABE

Beti amaitu gabe dagoen eginkizun baten izena da filosofia. Pentsatzen ikastea da pentsatzea; beharbada horixe da filosofiaren gakoa, ezagutzaren, balio-sistemen eta marko instituzional eta politikoen arrakala den neurrian. Zerbait nola pentsatu ez dakigun puntu horretan soilik hasten gara pentsatzen. Filosofia argi eta garbi amaitu gabea da, orain arte haren erresuma txiki –ustez unibertsal– izandakoaren muga lausoetan kokatzen garenean. Modernitate mendebaldarrak sortu zuen mundua, bere zibilizazio-proiektuaren antz eta irudira. Filosofia amaitu gabearen lehen irakaspena hau da: mundu izendatzen eta errepresentatzen duguna mundu bat baino ez dela, beste edozein mundu posible itzalpean utzi duena.