Lan Zuzenbidea

«Lan zuzenbidea» Goi Mailako Hezkuntzaren Europako Esparrura egokitutako eskuliburua da. Hortaz, kontuan hartu da lan-zuzenbidearen gaitasun bereziak garatzeko behar den denbora. Zortzi gai jorratu dira, denak ere labur, zuzen eta erraz antolatuta, lan-zuzenbidearen oinarrizko erakundeak azkar ikasteko moduan. Gainera, azalpenak osatu dira informazio gehigarriarekin eta eguneratutako arautegi eta jurisprudentziarekin. Egin-eginean ere, horiek guztiak kontuan hartzea ezinbestekoa da eduki teorikoak praktikan jartzeko. Era berean, azalpenekin batera, edozenbat adibide jarri dira, eta kasuan kasuko gaietan sakondu ahal izateko zenbait web-orrialderen berri eman da. Aztertu diren gaien artean daude lan-zuzenbidearen nondik norakoak, iturrien sistema, lan-kontratua, lan-kontratuaren modalitateak, lan-kontratuko subjektuen eskubide eta betebeharrak, lan-denbora eta atsedenaldiak, lan-kontratuak izan ditzakeen gorabeherak eta lan-harreman kolektiboak. Gainera, gai bakoitza praktiken atalarekin bukatzen da. Horrek ikasi beharrekoa behar bezala berrikustea ahalbidetzen du, hala banakako ikasketaren bidez, nola gelan gauzatutako partaidetza aktiboko saioen bidez. Gainera, kontuan hartu dira azken aldian egin diren lege-aldarazpenak, eta, batik bat, abenduaren 5eko 3/2018 Lege Organikoa, Datu Pertsonalak Babestekoa eta eskubide digitalak bermatzekoa; abenduaren 28ko 28/2018 Errege Lege-dekretua, pentsio publikoak goratzekoa eta gizarte-, lan- eta enplegu-arloan bestelako presako neurriak hartzekoa; martxoaren 1eko 6/2019 Errege Lege-dekretua, emakumeen eta gizonen artean enpleguan eta okupazioan tratu- eta aukera-berdintasuna bermatzeko presako neurriei buruzkoa; eta martxoaren 8ko 8/2019 Errege Lege-dekretua, gizarte-babeserako eta lanaldian lan prekarietatearen aurka borrokatzeko presako neurriei buruzkoa.