Prosas galegas

Segundo Ricardo Carballo Calero, as Prosas galegas de López Cuevillas caracterízanse pola súa seguridade, o equilibrio retórico e a súa trasparente sinceridade e claridade.
Nelas compílanse os textos máis exaltadores da realidade e dos valores galegos, introducíndose na paisaxe, nas aldeas e na tradición, ademais doutros dedicados á reflexión crítica sobre a sociedade do seu tempo. Achéganos tamén perfís biográficos de personaxes como Curros, Lamas Carvajal, Otero e Castelao, así como traballos de investigación sobre prehistoria, mitoloxía e etnografía, sempre a través dunha prosa que sorprende pola súa riqueza sintáctica, léxica e rítmica.